Zec 9 | NdeIBE | STEP | Ilizwi likaJehova liqophe ilizwe laseHadiraki lize liyokweyama phezu kweDamaseko – ngoba amehlo abantu lawezizwana zonke zika-Israyeli akuJehova

Zechariah 9

Ukwahlulelwa Kwezitha Zika-Israyeli Isiqalekiso

1 Ilizwi likaJehova liqophe ilizwe laseHadiraki lize liyokweyama phezu kweDamaseko – ngoba amehlo abantu lawezizwana zonke zika-Israyeli akuJehova –

2 laphezu kweHamathi layo, engcelelane layo, laphezu kweThire leSidoni, lokuba nje zilobungcitshi.

3 IThire isizakhele inqaba; isibuthelele isiliva kwangathi luthuli; legolide njengomhlabathi wemigwaqweni.

4 Kodwa uJehova uzayemuka inotho yayo achithe lamandla ayo asolwandle, kuthi yona iqedwe ngumlilo.

5 I-Ashikheloni izakubona lokho yesabe; iGaza izathuthumela izwe ubuhlungu, le-Ekhroni layo, ngoba ithemba layo lizabuna. IGaza izabhujelwa yinkosi yayo le-Ashikheloni isale ingaselamuntu.

6 Abezizwe bazayithatha i-Ashidodi bahlale kuyo, njalo ngizakuqeda ukuzigqaja kwamaFilisti.

7 Ngizathatha igazi emilonyeni yabo, okuyikudla okungavunyelwayo ngikukhuphe emazinyweni abo. Labo abaseleyo bazakuba ngabaka-Nkulunkulu wethu njalo babe ngabakhokheli koJuda, le-Ekhroni izakuba njengamaJebusi.

8 Kodwa ngizayivikela indlu yami kulabo abangabaphangi. Kakusayikuphinde kwenzeke ukuthi umcindezeli achithe abantu bami, ngokuba manje sengihlezi ngiqaphele.

Ukuza KweNkosi YaseZiyoni

9 Thokoza kakhulu, wena Ndodakazi yaseZiyoni! Memeza, Ndodakazi yaseJeresalema! Khangela, inkosi yakho iyeza kuwe, iza ilungile ilensindiso, imnene, ihamba ikhwele ubabhemi, iphezu kwethole, inkonyane kababhemi.

10 Ngizazisusa izinqola zempi ko-Efrayimi lamabhiza empi eJerusalema, ledandili lempi lizakwephulwa. Izamemezela ukuthula phakathi kwezizwe. Umbuso wayo uzasukela elwandle usiya elwandle, njalo kusukela eMfuleni kusiya emaphethelweni omhlaba.

11 Wena pho, ngenxa yegazi lesivumelwano lawe, ngizakhulula izibotshwa zakho emgodini ongelamanzi.

12 Buyelani enqabeni yenu, lina zibotshwa ezilethemba; sengihle ngibika ukuthi ngizalibuyisela izibusiso ngokuphindwe kabili.

13 Ngizamgoba uJuda njengalokhu ngigoba idandili lami besengigcwalisa ngo-Efrayimi. Ngizawahlokoza amadodana akho, wena Ziyoni avukele amadodana akho, wena Girisi, ngikwenze ube njengenkemba yebutho.

UJehova Uzaqhamuka

14 Kulapho-ke uJehova azaqhamuka ngaphezu kwabo; umtshoko wakhe uzabenyezela njengonyezi. UJehova Wobukhosi uzatshaya icilongo; uzahaluzela ngeziphepho zaseningizimu,

15 njalo uJehova uSomandla uzabavikela. Bazabhubhisa njalo banqobe ngamatshe ezavutha. Bazanatha baklabalale njengabadakwe liwayini; bazagcwala lona njengomganu osetshenziswa kuchelwa amagumbi e-alithare.

16 UJehova uNkulunkulu wabo uzabasindisa ngalelolanga njengoba bengumhlambi wezimvu zakhe. Bazakhazimula elizweni lakhe njengamatshe aligugu acecise umqhele.

17 Yeka ukukhanga kwabo lobuhle abazakuba yibobona! Amabele azazenza zikhuluphale izinsizwa, lewayini elitsha lithokozise izintombi.